Май 06 АБДУЛЛА ОРДУХАНОВ

АБДУЛЛА ОРДУХАНОВ

Дяведиз рекье гьатайла 28 яшинда авай Абдулла Ордуханов Нахчивандин Госпландин седри тир.

КцIара 1925-йисуз сифте яз советрин мектеб куьтягьайбурун арада Абдулла Агъамирзедин хва Ордухановни авай. 1910-йисуз Дагъустандин Самур округдин Чепер хуьре дидедиз хьайи Абдулла вичихъ чIехи алакьунар авай гада тир. 1931-йисуз Къубадин Хуьруьн Майишатдин Техникум, 1938-йисуз Азербайжандин Гьукуматдин Халкьдин Майишатдин Институт акьалтIарай жегьил 28 йиса аваз Нахчиван АССР- дин Госпландин седривиле тайинарнай. 1941-йисуз ам и везифа туна, гуьгьуьллудаказ дяведиз фенай. Дивизиядин автопаркунин, взводдин ва ротадин командирвиле, 5-Гвардиядин танкарин Армиядин корпусдин комбатдин заместителвиле къуллугъай Абдулла Ордуханов "Яру Гъед" ва Ватандин ЧIехи дяведин II дережадин орденриз ва гзаф медалриз лайихлу хьанай.

1946-йисуз Ватандиз хтай гвардиядин кьилин лейтенант Абдулла Ордуханов Республикадин Госпландин заместителвиле тайинарнай. 1947- йисуз ада КцIарин райкомдин I секретарвиле кIвалахнай. 1948-йисуз вич "Главтоннельстрой"дин началникдин заместителвиле кIвалахиз ракъурай А.Ордуханова са йисалай Республикадин Совминдин кадрийрин отделдиз регьбервал ганай. 1952-йисуз Генже вилаятдин исполкомдин седривиле кIвалахай ам гьа йисуз Генже вилаятдин советдиз депутатвиле хкянай. 1953-1954-йисара А.Ордуханов Нахчиван АССР-дин Госпландин седри хьана. 1955-йисалай пенсиядиз фидалди гьакъисагъвилелди Нахчиван АССР-дин Совминдин сад лагьай заместителвиле кIвалахай ам "Гьуьрметдин лишан" ордендиз лайихлу хьанай.