Май 06 СЕДРЕДДИН МИРЗАЛИЕВ

(Если у вас данный матераил отображается не корректно, то вам нужно скачать и установить лезгинский шрифт Lezgi)

СЕДРЕДДИН МИРЗАЛИЕВ

Женгерикай сада хура гуьлле акьур Седреддин Мирзелиев рекьинин пацукай са гужалди хкуднай. Ватандин ЧIехи дяве къарагъайла хуьлуьхъви Седреддин Исмиханан хцин 19 яшар цIийиз тамам хьанвай. Дяведа эвел взводдин, гуьгъуьнлай ротадин командир хьайи ада душмандин аксина кьегьалвилелди женг чIугунай. 1943-йисуз гуьлледи адан рикIяй тIвек акъуднай. Са йис кьван вахтунда госпиталда къаткай жегьил 1944-йисуз цIийи кьилелай фронтдиз рекье гьатнай ва дяве куьтягь жедалди женгера хьанай.

Вич Ватандин ЧIехи дяведин I дережадин ордендиз ва маса орденризни медалриз лайих акур офицерди дяве куьтягь хьайила Къунахкент райондин военкоматда инструкторвиле, IV ва I частарин началниквиле къуллугънай. Гуьгъуьнлай ада Бакудин Азизбегов райондин исполкомдин пландин отделдиз, са кьадар вахтунилай райкомдин теблигъатдин отделдиз регьбервал ганай. 1951-1956-йисара С.Мирзалиева Бакуда 589-полкунин штабдин началникдин куьмекчивиле кIвалахна. Са вахтунда Азизбегов райондин военкоматда отделдиз регьбервал гайи, военкомдин заместителвиле кIвалахай, вичихъ чIехи алакьунар авай полковник Седреддин Мирзалиева 5 йисуз Гуьйчайдин, 7 йисуз Генжедин военкоматриз регьбервал ганай.