Печать
PDF

ГЬЕКИМ МИРЗЕХАНОВ

ГЬЕКИМ МИРЗЕХАНОВ

Францияда фашистриз акси гьерекатдиз регьбервал гайи Гьеким Мирзеханов дяведилай вилик КцIар райондин кьил тир.

Ватандин ЧIехи дяве къарагъайла Азербайжандай райкомдин сад лагьай секретарвиле кIвалахзавайбурукай тек са кас гуьгьуьллудаказ фронтдиз рекье гьатнай. Ам Гьеким Мирзеханов тир. 1911-йисуз Къуба райондин Дигагь хуьре дидедиз хьайи, Къубадин гимназия, гуьгъуьнлай фиркъедин мектеб акьалтIарай, вичин савадлувилиз килигна ина муаллимвиле хвейи Гьеким Агъасидин хва Мирзеханова 1938-1941-йиса-ра КцIарин райкомдин I секретарвиле кIвалахнай, Самур-Девечи къанал акъудуниз регьбервал ганай. Къанал кардик кутурла ам Ленинан ордендиз лайихлу хьанай. Адан тIвар а ч1авуз Советрин уьлкведа сифте яз ихьтин орден къачур секретаррин сиягьда гьатнай. Гь.Мирзеханова райкомдиз регьбервал гайи вахтунда зегьметчийри къазанмишай агалкьунрай Азербайжанда сифте яз Кц1ар райондиз Азербайжандин К(б)П-дин ЦК-дин Яру Пайдах ганай. 1941-йисан январдиз Гь.Мирзеханов Москвадиз, ВПШ-диз к1елиз ракъурнай. Дяве къарагъайла ада гъиле яракь кьунай. 1942-йисуз хайибуру майор Гь.Мирзеханов дяведа квахь- на лагьай чIулав чар вахчуна. Амма гьакъикъатда Моздок шегьердин патав кьиле фейи дяведа вичел залан хирер хьайи ам немсери есирда кьуна Польшадиз, ахпа Франциядиз ракъурнай.

Франциядин Родез шегьерда есирда хьайи Гь.Мирзеханова фашистрин аксина женг чIуг-вадай чинебан кIватIал арадиз гъана, адаз регьбервал ганай. Ада Франциядин партизанрихъ ва генерал Шарль де Голлан кIеретIрихъ галаз алакъа яратмишнай. Адан кIеретIдик Азербайжандин Шеки, Товуз, Ленкаран, Хызы районрай, гьакIни Дагъустандин Кьурагь, Докъузпара районрай ва Дербент шегьердай тир 30-далай виниз есирарни экечIнай. 1944-йисан августдал къведалди Гь.Мирзеханова советрин 150 офицердизни аскердиз есирдай катиз куьмек ганай ва а ксари Франциядин партизанрихъ галаз санал фашистрин аксина женг давамарнай. Гьеким Мирзеханова 300-дав агакьна аскерриз есирдай катиз куьмек гун патал план гьазурнавай. Амма идакай хабар кьур фашистри Гь.Мирзеханов ва адан юлдашар гуьлле гана кьена. Мирзехановар Къуба патан машгьур лезги сихилрикай я. 1951-йисуз Гь.Мирзеханован уьмуьрдин юлдаш Севдагуьл Мирзеханова Азербайжан ССР-дин Верховный Советдин депутатвиле хкянай. Кц1арин куьчейрикай садаз Гь.Мирзеханован тIвар ганва. 

ГЬЕКИМ МИРЗЕХАНОВ

Автор  Седагет Керимова.

(Если у вас данный матераил отображается не корректно, то вам нужно скачать и установить лезгинский шрифт  Lezgi)

Comments:

Добавить комментарий


Защитный код
Обновить

Интересная статья? Поделись ей с другими: